The Red Devils don finally get back to winning ways after dem beat Norwich 4-0 for Old Trafford. The people wey score for the Reds na Marcus Rashford, Mason Greenwood and Anthony Martial.
Make we talk about the five things wey we observe for the game.
Firstly, Manchester United bin dey clinical today. Na how dem manage score four goals. Players like Juan Mata and Marcus Rashford bin step up, for me na two of dem play pass. We also wan hail Mason Greenwood for hin goal, e make brain.
Secondly, Manchester United bin try for back today. Harry Maguire and Victor Lindeof lock shop. We also dey happy with Brandon Williams, e don collect that left-back position from Luke Shaw.
Thirdly, Nemanja Matic and Fred control game for midfield. As dem control game, e allow make Juan Mata dey cause trouble for Norwich defence. E dey throw pass wey dey find our players in small spaces.
Also, We wan praise De Gea for hin world class save to deny CantWell. If say the ball enter net, the game for dey different.
Lastly, even though Manchester United win today, we still believe say dem gats strengthen for January transfer window. Them gats upgrade Andreas Pereira.