Manchester United don continue their winning ways as dem knack LASK 5-0 for Europa League. The people wey score for the Reds na Odion Ighalo, Daniel James, Juan Mata, Mason Greenwood and Andreas Pereira. Right now, the Reds dey 11 games unbeaten for all competitions.
We wan talk about the five things wey we observe for this game.
Firstly, Man United bin play very well. Everybody shine sote e dey hard to pick who play pass tonight. But if we gats decide, e dey between Odion Ighalo and Bruno Fernandes.
Secondly, we wan hail Man United’s defence as we believe say dem try wella. Bailly and Maguire combo make sense, dem dey lock shop. We also wan appreciate Brandon Williams as e play for right-back, where e no dey used to.
We also observe say Man United don set. Bruno Fernandes don improve this team. E also don improve the players around am. The biggest mystery right now na ‘Where Pogba go play when e come back? Who e go bench?’
We also observe say Mason Greenwood na the real deal. Upon say e start for bench, when e enter, e still score. We dey suspect say Van Persie don transfer the power of hin left-foot to Greenwood.
Lastly, if Man United fit continue like this, dem go carry Europa League trophy. Na wetin we believe, good night.