Manchester United don knack Crystal Palace 2-0 for Premier League on Thursday night. The people wey score for the Reds na Marcus Rashford and Anthony Martial. The Red Devils still dey 5th position but dem dey level on points with Leicester and dem dey one point behind Chelsea.
Make we talk about the five things wey we observe for the game:
The first thing wey we observe na say Manchester United no play well for first half but dem manage score before the end of the half. We gats hail Marcus Rashford for that goal as e make brain. Na Bruno Fernandes get assist but e no dey at hin best today.
The second thing wey we observe na say Manchester United bin play better when Nemanja Matic and Jesse Lingard wakka enter for second half. Scott McTominay no play shingbai, him no sabi play defensive midfield at all as e no sabi close players down. We hope say e go learn am if e wan dey start more games for United.
Another thing wey we observe na say David de Gea bin dey on fire tonight, na how Man United manage keep clean sheet. We also gats hail Fosu Mensah, Harry Maguire and Lindelof, dem try for back.
Another thing wey we observe na say Manchester United bin use their chances wella today, na why dem manage win. No be the best United game but the koko na say dem collect 3 points. E for be 3-0 but Bruno play shot wey knack post.
The last thing wey we observe na say Anthony Martial don prove say e fit dey lead the line for Man United. E don get 22 goals this season, same as Marcus Rashford. The French man dey move like person wey be better striker. We hope say e go score more goals.